Bang Mamit kagak mau ketinggalan. Atinye kepanggil pengin berpartisipasi ngebantu orang-orang nyang kena bencana banjir.
Takut dicap kagak punya ati. Mangkenye, Bang Mamit tampak superaktif ngebantu nyeberangin tetatangga lain RT nyang rumenye pada kebanjiran.
Lantaran kebanyakan terjun ke lapangan, ampe lupe ame anak bini.
“Mit, lu ude gile kali ye. Gare-gare banjir, lu ampe lupe ame anak bini. Liat tuh,… anak lu pade gegares gare-gare kagak perne jajan,” kate enyaknye.
Soal jajan ma, kecil nyak! Nih, tolong sampein anak-anak.
Kebeneran Pak Haji Beben kemaren kasih aye duit Rp. 50 ribu,” kata Mamit sambil mbeselin pade enyaknye selembar duit rada kucel karena basah kena air.
“Lu dapet duit dari mane ?” tanya enyaknye.
“ Dari mane,……dari mane kek. Emang perlu aye tegesin. Udeh deh, aye mau nyeberrangin orang lagi. Nooh…kasihan, nooooh……. Cewek bahenol. Kalo kagak diseberangin pan kasihan,” kata Mamit sambil pegangan tali penyeberangan.
“Mate lu emang suka ijo ngeliat cewek bahenol,” sergah enyeknye kesel.
Mamit kagak peduli ame komentantar enyaknye. Nyang penting, dia bisa nyalurin niatnye. Nolong orang kagak perlu balas jase.
Tapi, pikir punya pikir, mubazir juga kalo nyeberangin cewek bahenol kagak nyenggol-nyenggol dikit.
Mangkanye, ketika tangannye udeh pegang lengan tuh cewek, Mamit geser jari-jemarinye rada berani.
“Bang, jangan usil ah !” kata tuh cewek rada sewot.
“Alaaa, cuman kesenggol dikit aje sewot,” jawab Mamit makin berani nggegem jemari tuh cewek.
Kagak seneng dibuat iseng, si cewek nyentakin tangannya sampai Mamit kecebur ke genangan air.
Tangannye nggape-nggape minta tolong.
Tapi, orang-orang nyang nyeberang kagak peduli.
Cewek bahenol yang diseberangi Mamit cuma cengar-cengir.
“Rasain lu! Bencana banjir dimanfaatin buat iseng!” teriak tuh cewek.
Keruan aje semua orang cuma ngliatin Mamit nyang gelagapan keseret arus deres sampe megap-megap.
”Mak dirodok, kene batunye gue,” gerutu Mamit. (DDJP/stw)